جولة في ديوان المنظر -5

يا مرخصين الموت
عَلَنَاً على الشاشات
شايلين على التابوت
أرض وسبع سموات
يا عيال فداكو ملوك
وعقود ورق وصكوك
يا شعب لو يتلوك
آية من الآيات
نايم كحيل العين
أصحابه له داخلين
بالشنطة ع الكتفين
بيقبلوا الوجنات
ميت هتفتم عاش
دنيا في متر قماش
راح الفتى ببلاش
لو سبتو تاره يبات
مسجدنا مين شافه
خايل في أوصافه
أعمارنا أوقافه
تجري عليه الطلبات
تجري عليه الماي
وتقوله يا مولاي
يابو البدور إزاي
تخرج من الهالات
يا وشوش عليها الضيا
للوعد مستوفيه
دول ناس ومش أنبيا
دي كرامة مش كرامات

جولة في ديوان المنظر -4

أدي التحية العسكرية للعيال
عدلوا ميزاننا بعد ما ميزاننا مال
طرحوا سؤال وعجزنا عن رد السؤال
يا اخواننا مين فينا اللي تحت الاحتلال

أدي التحية العسكرية للبنات
شنط المدارس ضد صف الدبابات
تبكي ولا تقبل تعازي في اللي مات
تغلب دروع العسكري بطرحة وشال
أدي التحية العسكرية للعيال



أدي التحية العسكرية للشجر
يطرح علم غصن الزيتون اللي انكسر
يطرح شرر يطرح بشر زي القمر
وإن يقطعوه تفضل عروقه في الرمال
أدي التحية العسكرية للعيال


أدي التحية للي إدي الحق صوت
أدي التحية لشاب حب الأرض موت
أدي التحية العسكرية للبيوت
تتهد تبقى حجارة في إدين الرجال
أدي التحية العسكرية للعيال


أدي التحية العسكرية للقبور
فيها زهور لؤلؤ بحور وبدور تدور
فيها بذور يوم القيامة والنشور
مهما حصل ثابتة ف مكانها لا تزال
أدي التحية العسكرية للعيال

أدي التحية العسكرية للعيال
عدلوا ميزاننا بعد ما ميزاننا مال
طرحوا سؤال وعجزنا عن رد السؤال
يا اخواننا مين فينا اللي تحت الاحتلال

جولة في ديوان المنظر -3

من جيل لجيل
والطلقتين
متحوشين
والرد دين
يا إسرائيل

ده حساب طويل وما لهش حَدّ
مع كل حد يروح له حَدّ
وكل بيت في مصر حَدّ
على شهيد ناره تقيد
في سينا أو في بورسعيد
خمسين سنة إيه اللي جّدّ
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إسرائيل

إزاي حننسى ظلم فات
وهو متعاد ع الشاشات
ضرب العيال بالدبابات
هدّ المدارس ع البشر
كيف تتنسي بحر البقر
والدمّ فوق الكرّاسات
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إسرائيل
حق الجنود الأسرى فين
يتقتّلوا متقيدين
سرقوا دِبَلهُم مِ الإيدين
وحقهم في القبر راح
وجراح تفكّرنا بجراح
صبرا وشاتيلا ودير ياسين
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إسرائيل

خلي كلامك ع الوتر
دقق وحقق في الصور
تلقى ولد شايل حجر
واقف في غزة والخليل
يشبه ولد أسمر نحيل
في مصر جايَ ومُنتَظَر
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إسرائيل

جولة في ديوان المنظر -2

الملك الأسود في الشطرنج

وِقِف قلقان

قُدَّامُه ميدان

مليان دُخَّان

ورماح وسيوف

بيبُصِّ يشوف

الجيش مكشوف

فرسانه الزنج

الموت أستيكه وهُمَّه حروف

سكرات البنج

منَبِّه خوف

خَضِّ الفرسان

عَدَل العِمَّة ونَفَض العفرة عن القفطان

أصل السلطان

كان وَدَّى عساكره تدافع عنه في كل مكان

كيف ما بداله

يمينه شماله

ودَّى رجاله

على أفياله

وخيل خياله

حتى الطابية اللي باقياله

ووزيره وحاله ومحتاله

يموتوا بداله

في الأول كان هادي باله

موتهم مش مشكلة بالمطلق

دول بيموتوا لجل حياته

لكن لما الوضع تطور

فجأة تَذَكَّر

إنه العسكر

لو ماتوا

وبقى لوحده

من غير جنده

وحُماتُه

حتما يخسر

حك اللحية ملكنا وفكر

ملك الأبيض برضه مقلَّق

هو صحيح عايق ومشبرق

لسه العفرة ما وصلتلوش

بس الحظ مابيحبوش

في العادة بيخسر حروباته

وحظ الملك الأسود يفلق

جند الأبيض هاجم أيوة

بس مفَرَّق

والدنيا مش دايماً حلوة

يبقى عدوك عايز غلوة

تيجي عليك من دونه البلوة

الأبيض فاقد أعصابه

والأسود موته على بابه

من فتحه ما بين فارسين

بَصُّوا عل بعض الاتنين

لحظة وجات العين في العين

الاتنين بصوا على بعض

والقتلى ماليين الأرض

عرض الأول ع التاني

قام التاني قِبِلِ العرض

وادي يا سيدي نص جوابه :

بعد السلام

يا جلالة الملك الهمام

أعرض عليك وقف الخصام

عارف جلالتك طبعاً إنه اللعبة دي

ما بتنتهيش

إلا إذا واحد من الملكين يموت

لكن إذا ماتوا الجنود م الجانبين

نقدر أنا وأنت نعيش

واللعبة تخلص بالتعادُل

وَعَلَيهِ يا صاحبي المبجل

أطلب إليك إرسال جنودك للتقاتُل

حيث تُقتَل

وأنا كذلك بالتبادُل

واللعبة تخلص بالتعادل

زي ما أسلفت لك

ويا حبذا أيضاً إذا ما حلفت لي

وحلفت لك

إن العداوة بينا تصبح كالمفيش

وبلاها جيش

ثم السلام أحسن ختام

يا جلالة الملك الهمام

قُبِل الحل الإنساني

من غير كاني ولا ماني

وراح الجند المتفاني

مَيَّت فاني

وفِضلوا الملكين الأحرار

يتلقوا مباركة وتهاني

لاجل إيقاف إطلاق النار

صَبَح الأسود والأبيض

أحسن أحباب

وبقوا جيران الباب في الباب

صَبَح الأبيض والأسود

زي الإخوان

ما بقاش ده أبيض ولا ده أسود

لكن ألوان

واتشبِّك نسج الأنساب

زينة وبهرج سلطاني

نور الرضا تحت تيجانهم

ماليين نشرات الأخبار

وفضلوا العسكر في ميدانهم

موتى حافظين الأسرار.

جولة في ديوان المنظر -1

الله أكبر على حقل الزتون محروت ،

الله أكبر على عيش للحمام مفتوت ،

الله أكبر على أسلاك وراها بيوت ،

الله أكبر نشيد فوق البيوت منحوت ،

الله أكبر بقى المرة دي مش ح تفوت ،

الله أكبر ولو كانت تمنها الموت ،

الله أكبر عساكر خايفة من تابوت ،

الله أكبر عيال بيزلزلوا الملكوت ،

الله أكبر كبار بتقول كلام ملتوت ،

الله أكبر وحق انبحّ منه الصوت ،

الله أكبر على الباهت وع المبهوت ،

الله أكبر على الساكت يلاقي سكوت ،

الله أكبر على اللي يصدَّق الجبروت ،

الله أكبر ما متناشي ومات الموت ..!